نفسى افرح عمرو و أزعل نفسى

ايه يا ميرس !! عامل إيه ؟!!! - بصيت ورايا أشوف مين اللى بينده , لقيته الواد عمرو صاحبى اللى كان اول واحد تقريبا اشوفه فى المدرسة اليوم ده - عمورة حبيب قلبى !! اخبارك انت إيه ؟ - و عمرو ده جدع جدا و صاحب صاحبه , وواحد من افضل الشخصيات اللى عرفتها فى حياتى - إيه هتشوف الماتش فين النهاردة ؟ - آآآخ !!! بدأنا ! أعدت اقول فى بالى مش كنت تستنى عليا شوية لما أخد نفسى من المواصلات , ده الترام ده جبلى السكر من السرعة الفظيعة اللى كان ماشى بيها , سرعة 340 كم فى السنة - المشكلة اللى انتوا مش عارفينها إن عمرو ده يعتبر من اكبر مشجعى الزمالك فى إسكندرية , و مقتنع إن الزمالك فريق مالوش حل , و انا كمان اعتبر زيه بالظبط و بالملى , بس الفرق الوحيد إنى زيه من الناحية التانية !!!!! أيوة مستغربش , أصل محسوبك اهلاوى صميم و دمه لونه احمر من أبو 3 نجوم ( ولا ساعتها كانوا نجمتين بس , أصل الحكاية دى قديمة شوية من أيام ثانوى ) المهم إنى إستتنجت كدة إنه هيصدعنى من كتر الكلام عن ماتش بالليل ( اللى ما بين الأهلى و الزمالك طبعا ) و يعد يحكيلى عن اللعيب الفلانى اللى هما جايبينه من بلاد الواق واق , و إزاى اللعيب ده هو و باقى فريق الأسد المرعب هيقطعوا فريق الأهلى المسكين ( يظهر البمبكة ديه خصله قديمة فى الزملكاوية , هو اللى بيجرا فيهم شويه ) - بقولك إيه انا مش ناقص يا عمرو , لو هتكلمنى فى حوار الماتش ده يبقى بلاش نتكلم احسن - أصل انا من مدرسة الأهلى فى التشجيع و هو الرد فى الملعب , و زى ما قالت فودافون اللى هى السبونسر بتاع الاهلى " نتكلم بالليل " .
أعدت افتكر الزكريات الجميلة ديه قبل ماتش ألقمة ما يبدا , و اعدت افكر هو فين عمرو دلوقتى . و يا ترى ربنا تاب عليه بعد ما خلصت ايام الثانوى و الجامعة و كل واحد اشتغل , ولا لسه عندة الادمان ده , يااااااااااه !!! كانت أيام , ربنا ما يرجعها هههههههه , طبعا أصلها كانت أيام ثانوى ولا عايزينها ترجع و أعد اذاكر فيزيا تانى . و اعدت افتكر الايام اللى بعد المباريات , كان لما الزمالك بيفوز كان بيكون يوم باين من اوله , ألاقيلك عمرو ده طاير من الفرحة و اول ما يشوفنى يركب على ودانى و هات يا تقطيع فى الأهلى - هى دى فرقة ديه , هو ده جون , ده غيه الفريق الشوربة اللى كان بيلاعبنا ده - و هاتك يا تقطيع و الواحد ساكتله و هى كلمة واحدة اللى برد عليه بيها - ما تفرحش قوى كدة , هيجيلك يوم و تبقى فى مطرحى و ساعتها مش هرحمك - و فعلا مكانش الموسم يعدى اللى و اكون فشيت غلى .
ألاقيلك عمرو ده جى متخفى , ضارب النضارة الشمس اللى اكلة نص وشه (و الدنيا بتكون مغيمة اساسا ) ور افع الياقة بتاعت الجاكت و عاملى فيها المفتش كولومبو ( ده طبعا الاصلى قبل ما يجى كرومبو ) و فاكر انى كدة مش هعرف اقفشه , لكن على مين - ايه يا عمرو محدش سمع صوتك النهاردة يعنى - الاقيه يبصلى و هو مستغرب لدرجة انى بشوف عنيه مبرقة من ورا العدسات الغامقة - ايه ده انتى عرفتنى - انجعص قوى انا ساعتها و افرد طولى - يا سلام يا خويا متخفى و عاملى فيها مخبر , معرفتكش انا كدة - و افضل استلمه تقطيع , يؤازرنى لفيف من الجماهير العريضة فى كافة انحاء المعمورة و المنتزة كمان و لحد بحرى مرورا بسان استيفانو و سيدى جابر لحد ما الاقى الواد عمرو ده هيعيط فى إيدى .
و دلوقتى بعد ما بدا الماتش و فات منه حوالى تلت ساعة يتيمة و الأهلى مدخلش غبر 3 أجوان بس , إفتكرت الواد عمرو تانى , و إفتكرت رزالته عليا لما كان الأهلى بيتغلب , و اعد أسال نفسى الأيام دى ممكن ترجع تانى ( متبقاش ذكى و تقولى ايام الثانوى , بجد مش طلباها فيزياء ) انا قصدى لما كان بيعد يترازل عليا قبل الماتش و بعده .
بجد يا عمرو و احشنى جدا و لو مستخبى منى عشان الأهلى بقاله سنين عمال يقطعكوا مش مشكلة , يا عم نسيبلكوا ماتش اتنطط بيه عليا عادى بس أرجع أشوفك من تانى .
ملحوظة - القصة دى حقيقية مع شوية خيال و بهديها لكل أصحابى اللى بفتقدهم و أثروا فى حياتى و نفسى اشوفهم مرة تانية - .